迷思四︰自閉症譜系障礙係由於偏食所致？| 林嘉儀醫生

偏食唔會引起自閉症，但呢個情況喺自閉症小朋友當中就幾常見。

自閉症小朋友偏食原因眾多，例如習慣進食某類蔬菜，突然要佢轉食另外一種，佢哋就會感到非常抗拒；佢哋亦可能對食物顏色、質感及形態反感，於是拒絕進食。

曾經遇過一個極端個案︰有位3歲小朋友每餐只會進食菜心、三文魚同米飯，對其他食物一概不聞不問。為咗小朋友每餐溫飽，媽媽只能烹調呢3種食材，並且要考慮點樣令佢接受其他食物，務求一步一步改善其飲食習慣。否則，當小朋友偏食問題愈來愈嚴重，就會影響到成長及社交發展，後果深遠。